إزاي أقرا تقرير الميديا باير — 6 أرقام بس تبص عليهم

كل أسبوع بييجيلك تقرير أو سكرين شوت من الميديا باير فيه عشرات الأرقام — Reach، Impressions، Frequency، CTR، CPM، CPC، ROAS، Add to Cart، Checkout Initiated، وأرقام تانية كتير. المشكلة إنك مش محتاج تفهمهم كلهم عشان تعرف حالتك الحقيقية. محتاج تركّز على 6 أرقام بس، وباقي الصفحة تفاصيل بتخدمهم.

1. الـ ROAS — بس اسأل عن النافذة الأول

الـ ROAS (العائد على الصرف) هو أول رقم هيلفت نظرك، وأخطر رقم لو قريته من غير سياق. نفس الحملة بالظبط ممكن تديك ROAS 2 على نافذة أتربيوشن ضيّقة (كليك خلال يوم)، وROAS 4 على نافذة واسعة (كليك 7 أيام + مشاهدة) — من غير ما الأداء يتغيّر جنيه واحد. الفرق كله في العدسة اللي المنصة بتحسب بيها.

في كيسات حقيقية شفنا ROAS يتراوح بشكل كبير حسب المنصة والمنتج: كيس براند فيتنس على سناب وصل لـ ROAS 4.6 على حملة واحدة، وفي حساب تاني على نفس المنصة عمر أطول وصل لـ 13.57. حساب Meta على 448 كامبين طلع متوسط ROAS 3.22. الفرق مش دايمًا في جودة الحملة — جزء كبير منه في المنصة والنافذة والفترة الزمنية.

القاعدة اللي بتحميك: اسأل «الرقم ده على أنهي نافذة أتربيوشن؟» قبل أي مقارنة. التفاصيل كاملة في الـ ROAS اللي في المانجر مش دايمًا الحقيقي.

2. تكلفة الأوردر (CPO) — الرقم اللي فعليًا بيحدد ربحك

الـ ROAS ممكن يبان حلو والبيزنس يكون خسران، لأن الـ ROAS بيحسب إيراد مش ربح. الرقم اللي بيحدد فعليًا هل إنت رابح أو خسران هو تكلفة الأوردر (CPO) مقارنة بنقطة التعادل بتاعتك — يعني أعلى مبلغ ممكن تصرفه على أوردر واحد وتفضل رابح بعد ما تحسب تكلفة المنتج والشحن والمرتجعات.

في كيس السكيلينج من 1.1 لـ 6.3 مليون جنيه، جزء أساسي من النجاح كان تنزيل الـ CPO من 37.5 جنيه لأقل من 25 جنيه — مش بزيادة صرف، بضبط الميزانية على المستوى ده تحديدًا. وفي كيس زيت الشعر، الـ CPA وصل لـ 38 جنيه بعد إحياء كرييتف محروق بدل إنتاج جديد، وده اللي خلّى 7 مليون جنيه في شهرين ممكنة بربحية.

لو الميديا باير بيوريك ROAS بس ومش بيربطه بتكلفة الأوردر ونقطة تعادلك، هو بيوريك نص الصورة. احسب نقطة التعادل بتاعتك في بجيب أوردرات وبخسر — إزاي تحسب ربحك الحقيقي وبـكالكوليتر التعادل قبل أي مكالمة تقييم جاية.

3. معدل التحويل (CVR) — رقم اللاندنج بيدج مش الإعلان

معدل التحويل بيقولك هل الزيارة اللي الإعلان جابهالك بتتحول لبيعة ولا لأ. ده رقم اللاندنج بيدج والعرض، مش الإعلان نفسه — إعلان قوي بيجيب زيارات، بس اللي بيحوّلها بيعة هو الصفحة والأوفر.

الفرق بين متجر وتاني في الرقم ده كبير جدًا. في كيس ستور الكويت الـ CVR كان 1.97% (ضعف متوسط السوق) على 7 شهور. في كيس التيشيرت بأوفر آخر الموسم وصل لـ 6.53% على 352,990 زيارة. وفي كيس الستور اللي حذفنا منه الكارت، تغيير معمار الفانل بس رفع الـ CVR لـ 3.14%.

الرقم لوحده مش كافي — محتاج تقارنه بمعيار حقيقي. شوف بنشمارك الإيكومرس في مصر والخليج عشان تعرف رقمك واقف فين فعليًا، مش بالإحساس.

4. الـ CPM جنب الـ CTR — واحد لوحده مايقولش حاجة

الـ CPM (تكلفة الألف ظهور) هو سعر دخولك للمزاد، مش مؤشر أداء. بيزيد في المواسم المزدحمة أو لما تكبّر الميزانية فجأة، وده طبيعي. المشكلة الحقيقية لما الـ CPM يطلع والـ CTR ينزل مع بعض — ده معناه الكرييتف بدأ يهبط والجمهور بقى بيتجاهل الإعلان.

في كيس ستور الكويت زيادة الصرف 25% في شهر واحد وقّعت الـ ROAS من 3.31 لـ 2.79. وفي المقابل، إحياء الكرييتف بالـ Re-Hook في كيس زيت الشعر رجّع الـ CTR لـ 4.9% وحافظ على CPA 38 جنيه رغم أي ارتفاع في السوق. التفاصيل الكاملة عن إمتى تقلق فعلًا من الـ CPM في ليه الـ CPM بيزيد وإمتى تقلق فعلًا.

5. نسبة العملاء الراجعين — الرقم اللي بيقولك المتجر ولا الإعلان بس

كل الأرقام اللي فاتت بتقيس الإعلان. الرقم ده بيقيس المتجر نفسه: هل العميل اللي اشترى مرة بيرجع يشتري تاني من غير ما تدفع إعلان تاني عشانه؟ لو مفيش تكرار شراء، بتبني على رمل — كل شهر بتبدأ من الصفر بنفس تكلفة الاكتساب.

في كيس ستور القهوة نسبة العملاء الراجعين وصلت لـ 54% في شهر واحد. وفي كيس ستور فيتنس في الخليج وصلت لـ 40.66% على 7 شهور مع خصومات 0.64% بس — يعني الريتنشن مبنيّ على المنتج والتجربة مش على تخفيض السعر باستمرار. حساب تاني وصل لـ 56.67% نسبة عملاء راجعين في شهر واحد بعد 4 شهور من الشغل المتواصل.

لو الميديا باير بتاعك بيركّز على جلب عميل جديد بس ومبيسألش عن الرقم ده، هو بيشتغل نص المعادلة. اقرا الريتنشن — إزاي تخلّي العميل يشتري تاني من غير إعلانات.

6. الصرف الفعلي مقابل المتفق عليه

آخر رقم بسيط وبيتنسى: هل الصرف الفعلي في الشهر مطابق للميزانية اللي اتفقتوا عليها؟ فرق كبير بين المتفق عليه والمصروف فعليًا — سواء زيادة من غير علم أو نقص من غير تفسير — بيبان في نفس السطر اللي بتشوف فيه النتيجة، وغالبًا بيتقفز عليه لأن التركيز بيروح للـ ROAS.

اسأل الميديا باير سؤال مباشر كل شهر: «الصرف المتفق عليه كام، والمصروف فعليًا كام، ولو فيه فرق ليه؟». لو الإجابة مش جاهزة بالثانية، هو مش بيتابع حسابك يوميًا. علامات تانية على إن حد بيحرق فلوسك من غير متابعة حقيقية موجودة في علامات إن الميديا باير بتاعك بيحرق فلوسك.

إزاي تطبّق الـ 6 أرقام في تقرير حقيقي

المرة الجاية اللي تستلم فيها تقرير، اعمل الترتيب ده:

1. اسأل عن نافذة الأتربيوشن قبل ما تبص على رقم الـ ROAS.
2. قسّم الصرف على عدد الأوردرات واحسب الـ CPO، وقارنه بنقطة تعادلك.
3. شوف الـ CVR وقارنه ببنشمارك حقيقي.
4. شوف الـ CPM والـ CTR مع بعض، مش كل واحد لوحده.
5. اسأل عن نسبة العملاء الراجعين، مش بس عملاء جدد.
6. طابق الصرف المتفق عليه بالمصروف فعليًا.

الـ 6 أرقام دول بيغطّوا السلسلة كلها: الإعلان، الصفحة، الربح، والعميل اللي بيرجع. أي تقرير تاني مليان أرقام إضافية ممكن يكون مفيد، بس لو الـ 6 دول مش واضحين فيه من أول قراءة، اطلب من الميديا باير يبسّطهم قبل أي حاجة تانية.

الخلاصة

مش محتاج تبقى ميديا باير عشان تفهم تقريرك — محتاج تعرف الـ 6 أرقام دول وتطلب توضيحهم كل مرة. لو حد بيقولك إن الموضوع معقّد أكتر من كده، أو إن الأرقام دي «مش بتقول الصورة الكاملة»، اسأله يوريك مصدرها بالتفصيل. الشفافية في التقرير مش رفاهية، هي أساس إنك تاخد قرار صح على فلوسك. لو حاسس إن تقاريرك مش بتوضّح الـ 6 أرقام دول، اقرا إزاي تختار ميديا باير لمتجرك وبكام الميديا باير في مصر والخليج، وشوف الكيسات بأرقامها كاملة وتفاصيل شغلي هنا.